Како и во секој бизнис, така и во угостителството е потребна инвестиција. Колку и дали таа инвестиција ќе ви се исплати зависи од многу фактори

Но најважниот фактор, кој за жал кај нас е запоставен е човечкиот фактор, т.е. инвестицијата во персоналот.Ќе земам за пример еден просечен кафе бар. За да го отворите треба да најдете добар локал. Да го опремите внатрешно треба да ангажирате архитект кој ќе го осмисли и направи проектот, градежни работници кој тој проект би го реализирале. Треба да купите инвентар (маси и столици) или да ви го направат по нарачка, да го опремите со потребните апарати: кафемат, ладилници и слично. Потоа доаѓаат чашите и ситниот инвентар и на крајот алкохолните и безалкохолните пијалоци.

Целокупната инвестиција за ова би ве чинела од 30-40 илјади евра па нагоре (во зависност од локалот) и тоа во случај ако локалот ви е под закуп. Ако се одлучите да го купите тоа би чинело многу повеќе.Со ова се смета дека инвестицијата е завршена и на сопствениците им останува само да најдат персонал и кафе барот може да работи. После отварањето сите инвестиции завршуваат и се мисли единствено како за најбрзо време да се вратат истите и по можност да има и одреден ќар.

Една еврејска поговорка вели дека за успешен бизнис или бизнисмен се смета оној кој може да ги поврати инвестициите за 5 години. Ако тргнеме од таа логика кај нас навистина се малку угостителските објекти што работат 5 или повеќе години без престан или без да се сменат сопствениците.
Но да продолжиме со приказната за кафе барот. Се прави гламурозно отварање каде што секој пие што сака и колку сака (дури и повеќе од тоа). На крајот од вечерта кога би се пресметало колкав би бил прометот кога сето тоа би се наплатило ќе одговара на промет кој би се направил за две неделни па може и за цел месец. Но ајде нека е за убаво, работата оди понатака. Првиот месец или првата сезона се тече како што треба или како што мислат дека треба. Со оглед на тоа дека најверојатно за прв пат се во угостителскиот бизнис се додека има промет, се е добро.

Но после неколку месеци започнуваат проблемите, до тој локал или во близина се отворил друг, кој е различен од претходниот само по името. Полека гостите ќе се префлат во новиот локал, и прометот ќе почне да паѓа. Во таа ситуација прво страда персоналот, тој е обвинет за лошата работа и следуваат казни и отпуштања од работа. По неколку рокади на персоналот сопствениците сфаќаат дека можеби и не е од персоналот. Па прво нивно логичко решение со кое би го спасиле локалот и би ги вратиле гостите е да направат негово реновирање. Но за жал, ефектот од реновирањето е многу мал или воопшто не постои.

И тука некаде би завршила приказната. За година или две работа ќе се реновира локалот неколку пати, ќе се сменат многу гарнитури на персонал и на крајот или локалот ќе се затвори или ќе се отстапи на друг сопственик. Многу големи инвестиции кои не само што не се враќаат туку и се дуплираат загубите.
Тоа беше една од многуте приказни кои за жал се вистинити и често се случуваат на нашите простори.

За ова да не се случува поребен е план и паметна инвестиција со која многу ќе заштедите и вашиот бизнис ќе биде профитабилен. Да се навратиме на пртеходната приказна со кафе барот. Сте се одлучиле да отворите кафе бар и сте нашле локал. Пред да оставите се во рацете на архитектите треба да имате во предвид неколку работи:
-колкава е големината на локалот (квадратура)
-според таа квадратура колкав би можел да биде оптималниот капацитет на гости
-колкав шанк е потрбен за да ги опслужи тие гости
-каков распоред би бил најпогоден за да може максимално да се искористи просторот, а истовремено да биде функционален за работа

Секоја чест на архитектите, ама нивна првенствена цел е да направат локал кој бил изгледал убаво, што е во ред. Но за жал многу често се случува да заборават на функционалноста што понатаму води кон непотребни инпровизации. 
Затоа кога ќе ги решите наведениве работи може да се почне со подготвувње на локалот. Истовремено треба веќе да имате и персонал, кој ќе се обучува дури се спрема локалот. Значи паралелно имате две инвестиции: една во локалот (градежни работи, крупен и ситен инвентар, пијалоци...) и друга инвестиција во персоналот.

Кога сите работи ќе бидат завршени, локалот ќе биде готов и персоналот подготвен за работа, многу е полесно да го отворите. Секој си ја знае работата и се функционира како што треба. И ве молам без помпезни и спектакуларни отварања, Точно е дека треба да се прослави, ама имајте во предвид дека локалот треба да работи долги години а не само таа вечер.

Правилната инвестиција ви е во човечкиот фактор, т.е. во персоналот. Работата на вашиот локал ќе зависи од професионалноста и стручноста на вашиот персонал. Угостителството е работа која се работи со луѓе. Запаметете- гостите не доаѓаат да седат на вашите столчиња кои што чинат 300 евра. Не доаѓаат само за да пијат кафе, кафе можат да пијат дома или на работа. Гостите доаѓаат да бидат УСЛУЖЕНИ, да се опуштат и да го добијат потребното внимание што не можат да го добијат дома или на работа.

И уште една работа, за да заштедите пари, време и нерви можете да ангажирате компанија која работи консалтинг и обука за угостителство. Тоа многу често е пракса во светот а веќе и кај нас постои таква компанија. Како што ангажирате архитекти, градежни работници треба да ангажирате и професионалци кои ќе ви го постават правилно системот на работа и ќе го обучат персоналот да го спроведе тој систем.Иднината на угостителството е во професионализмот и во овој бизниз ќе опстанат тие што ќе нудат квалитетна услуга.