Bar CODE Br.10

Barcode n.10

По навика од минатата година, декемвриско- јануарскиот број на Бар Код е значително пообемен од останатите. Веројатно, сме претпоставиле дека за време на празниците кои наидуваат ќе имате повеќе време за читање и размислување.

Во овој број преовладуваат темите поврзани со барменството- неколку интервјуа, настани, барска опрема, но и информациите за новата револуција во светот на коктелите и во гастрономијата. Пените, кашите, кремовите и сорбето влегуваат зад шанковите и во кујните на голема врата. Запомнете го овој момент во историјата на угостителството- откако заврши истражувањето на териториите за мешање на вкусовите, започнува ерата на експериментирање со текстурата на пијалоците и храната. Идејата која потекна од Шпанија, забрзано се развива во Британија и се шири низ целиот свет. Се истражува на големо, се организираат семинари и предавања на теми кои до пред некоја година не сте можеле ниту да ги замислите, како нуклеарна гастрономија и молекуларна миксологија. Држете ги очите отворени во овој возбудлив момент, бидете модерни и веднаш применете ги новитетите во вашите објекти.

Тоа е она што доаѓа. А какви впечатоци имаме од она што беше. Декември е природен период за разни ретроспективи, навраќања на убави спомени од изминатите дванаесет месеци и момент за новогодишни резолуции... Да, со име ќе ги кажам оние кои ме одушевија во изминатата година, за да имаат мотивација да продолжат и да им дадат пример на останатите. Ме одушевија угостителите кои наместо да се жалат и кукаат, ревносно почнаа во рамките на своите можности да прават подготовки за примена на ХАССАП системот, затоа што знаат дека тоа е добро- Далма, Дивино, Дал Мет Фу, Ориент Експрес.. Ги почитувам сите кои ги воведоа живите свирки и ја вратија диско музиката во дискотеките- Колосеум, Миднајт, Хавана... Ги сакам угостителите кои храбро и на сопствен ризик решија да внесат приказна во своите објекти- Цајо во своето ретро кафе, Весна во ресторанот Аладин, Буштур во Ла Бодегита дел медио, Јасна во Виена кафе..... Храбрите кои со години успеаја да го задржат нивото без да потклекнат на краткорочните турбо фолк шеми- Интермецо, Бастион, Нана... и на крај оние читатели кои освен барањето за претплата, и уплатија пари за да се претплатат!
Тоа е она што го кажуваше теренот во 2008. Но, Што кажуваше Бар Код и има ли единствен заклучок од сите теми и агли кои ги зафативме за да си помогнеме себе си? Она што ми паѓа во очи во сите изминати текстови и интервјуа, а особено во серијалот Кафеански муабети каде што интервјуиравме познати личности кои угостителството го набљудуваат од страна, е задничкиот заклучок дека најголем проблем на ова поднебје е што сите угостителски објекти кај нас се ИСТИ! Дали е ова заоставштина од минатото кога не убедуваа дека сите луѓе се исти со исти потреби, или недостаток на храброст (мојата омилена но толку отсутна во околинава, карактерна црта) не знам, но знам дека мора да се промени. Угостители вие сте на потег! Не затоа што мене така ми текна за да ми биде поинтересен муабетот, туку, затоа што тоа е заеднички крик, единствено НЗС на сите дваесетина соработници кои пишуваа за вас во изминатите броеви на Бар Код.

Кликни за симнување на Bar CODE бр.10