Забрането Пушење

Пишува Бојан Манушев, дописник од Амстердам

Од први јули оваа година холандската влада го забрани пушењето во сите угостителски објекти со што конечно стави крај на долгогодишната полемика околу прашањето за пушење на јавни места. Главниот проблем беа кофи-шоповите (читај продавниците на марихуана и хашиш) затоа што тие по природата на нештата се смислени за пушење . досетливите Холанѓани и за ова најдоа соломонско (бог да чува) решение. Имено, сите уживатели на добриот џоинт, отсега ќе мораат да ги виткаат џоинтите без тутун, “чисти”, што ќе рече само трева.

Сето ова не би било ништо невообичаено кога би можело да се примени во пракса. Но не е се онака како што се чини. Пушачите сакаат да пушат и тутун. Па така, Холандија не би била Холандија без толерантноста, генијалноста, а пред се досетливоста на брилијантниот мултиетникум. Тие во еден момент дојдоа до најнеобичното решение за овој проблем. Но да се вратиме седум месеци наназад. Два месеци пред донесувањето на драконскиот закон за непушење. Во Амстердам почна сеопшта мобилизација на пушачката односно интелектуалнта (и јас пушам) и артистичка елита. Како плод на оваа мобилизација израсна “Цркавата на пушачите” !?

Централно начело на оваа нова религија е погодувате, пушењето!?. Логиката на промотерите на новата религија беше, дека ако на верниците на оваа религија им забраните да ја практикуваат својата вера-пушењето, би го прекршиле законот за слобода на вероисповед. И така на вчудоневидување на целата јавност овој одличен циркус се одвиваше до први јули кога и дефинитивно и се стави крај на оваа иницијатива. Замислете, во некои земји ја употребуваат религијата за да би се истребиле едни со други, а во Холандија си играат мајтап со црквата. Бидна што бидна, и законот стапи на сила. Веднаш потоа во сите ресторани, кафулиња, ноќни клубови и дискотеки се исфрлија пепелниците и се извадија големите социјалистички пепелници пред вратите на истите. Немаше проблем во спроведувањето на законот, лето бре брате (холандско онака 18-20 степени) и фино сите си седевме надвор и си пушевме, немаше проблеми. Но кога пристигна студениов ноември се соочивме со истиот проблем со пушењето. Ја нема црквата на пушачите, студ фатил, не може да се стои пред врата, кредитна криза... и почнаа да паѓаат првите жртви.

Кафуле по кафуле, ресторан по ресторан, почнаа да се затвораат едни од најстарите лендмаркови во амстердамскиот артистички центар “Јордан” затоа што во кафеана се оди да се пие и да се пуши, не бива пиење без пушење. Сепак Холанѓаните почнаа да се снаоѓаат и во оваа ситуација, па оваа приказна и нема така тажен крај. Итрите граѓани односно послушните поданици на кралицата Беатрикс, повторно смислија начин како да не си го кршат меракот и да дозволат досадните и жедните за здрав и долг американски живот да победат. Тие воведоа граѓанска непослушност. На интернет почнаа да излегуваат страници со податоци во кои кафеани сеуште може да се пуши. Тоа се рашири со молскавична брзина низ сите градови. Секоја од овие кафеани воведе каса за казни која би ја платила казната во случај на контрола. Влегувате во кафеана и ставате едно евро во касата за казни при што барменот ви дава пепелник и си пушите до мила убавина! Како куриозитет до касата за казни стои слика на кабинетот на кралицата каде што на видно место стои пепелник. Епа, и над попот има владика!