Каков е влезот во вашиот омилен локал?

Ако пред вас има три ресторани еден до друг, а од претходно не ви се познати што нудат и колку се добри, во кој од нив ќе влезете? Веројатно во оној кој најмногу ќе ве привлече со својот влез! Влезот во бар или ресторан

е исто толку важен колку и неговата внатрешност. Освен во мали места како кај нас, каде се уште излегуваме на познати места и се уште немаме навика да избираме место за седнување шетајќи по улица, влезот, всушност има клучна улога во изборот за посета на одреден локал. Влезот е она што ќе го привлече случајниот минувач да застане и одлучи дали ќе влезе во одреден објект. Влезот е многу важен генератор на нови посетители секаде во големите градови.

Ако ме прашате мене, оваа тема и тоа како треба да добие на значење и кај нас, особено во последниве две години, можеби не од горенаведената причина, но од  причина што, поради рестриктивниот закон за пушење, во зима повеќето гости го минуваат половина од својот престој во угостителскиот објект токму пред влезот. Тоа значи дека, исто како што ни е важно внатрешноста на локалот да биде пријатна и привлечна, веќе подеднакво важно станува и надворешниот простор пред влезот да биде пријатен за престој на оние кои излегуваат надвор на цигара.

Освен овие две причини, влезот е важен и од аспект на тоа што, исто како и кај луѓето, тој го дава првиот впечаток за објектот и неговите сопственици. Од него многу лесно може да се изведе заклучок за идентитетот на барот, неговата приказна и тип, односот на сопствениците кон него (а следствено на тоа и кон вас како кон потенцијален гостин), а од влезот може да се заклучи и какви цени може да очекувате кога ќе влезете во барот.

Кај нас, иако има доста примери на коректен пристап кон влезовите, сепак го имам впечатокот како, ниту сопствениците, ниту архитектите , да не посветиле внимание на влезот при планирањето на своите објекти. Точно, постојат табли и тотеми со името на локалот, постојат и цвеќиња од двете страни на влезот но сепак отсуствува шлифот.

Отсуствува креативност и симпатичност, но и неколку технички неопходни нешта кои редовно се забораваат. На пример, ретко кој влез кај нас има мала стреа која би ги заштитила гостите при задржувањето пред влегувањето ако врне (или не дај боже некоја баба ако тресе трошки од прозорецот во зградата над објектот). Понатаму, ниту еден влез нема пристап за посетители со посебни потреби што го сметам за страшна дискриминација во однос на гостите. И на крај но не и неважно, ретко кој ја одржува хигиената околу влезот подалеку од еден метар од влезот.
Освен естетскиот и практичниот функционален аспект на прашањето за влезовите, како што пишувавме и во еден од минатите броеви, влезот има улога и во тоа колку “среќа” ќе има еден објект во своето идно работење.

Имено, според  фенг шуи филозофијата, влезот во голема мерка ја одредува судбината на местото. Според тоа, на пример, треба да се избегнува црвената боја на влез, иако на многу локали таа боја им е омилена бидејќи привлекува внимание од поголема далечина. Позицијата на влезот е исто така клучна за протокот на позитивната енергија и не ретко се случува да се менуваат плановите на цели згради само за да се обезбеди позиција на влезот која ќе донесе повеќе среќа во идното работење.

Јасно е дека едно е идеалната ситуација, а друго се ограничувањата кои ги дава просторот околу влезот. Тесните тротоари, малиот простор за врата, а уште полошо местоположбата која може да биде и во трговски центар не оставаат многу простор за креација. Во тој случај можеби нема да има место за црвен тепих со златни столпчиња за да ги направи гостите да се чувствуваат поласкано и вредно уште на влезот, но сепак ако се согледа значењето на ова прашање може да се смислат илјада начини како да се реши истото. Архитекти и газди, вие сте на потег!

НАСОКИ ЗА СЛИКИ- НА ISTOCK СО KEY WORDS- “RESTAURANT ENTRANCE” има доста убави